وأنا جالس في مجلسي وأمام جهازي استهوتني قصص وسوا ليف ومنها أصابني الهاجس وأنا أفكر وأتعمق بفكري وخيالي إلى أن رسيت أسير مثل الرحال في هذا الزمان
المهم لبست غترتي وثوبي ونزلت كالعادة ركبت سيارتي وقلت بالمرة اخذلي كابتشينو بس في نفس الوقت برستيجي ما يسمح أشربها وأنا في السيارة قلت أوقف أحسن وأشوف لي مكان مناسب وأشربها فيه
وقفت موتري ودخلت المقهى إلا أنواع الإزعاج والقرقرة حقت الرفقى صفيت معهم إلا ويقول لي واحد منهم كيها ليه ما رديت طنشت قدني طفشان منهم ضحك إلي بجنبه وقال تيقا هيه حسيت بصعب المنال في نفسي في هذه اللحظة كيف ما رديت عليهم 
ما علينا خت قهوتي وعلومي وجيتك خارج إلا بالصراخ والهواش من جديد في الخارج ايش فيه بالربع عالمكم قالي واحد مروق قاعد يصور شكله خواجة!!
فيه مضاربة على الموقف قلتله ايش الاسم الكريم لو تكرمت قال عبادي 2005قلت وليه 2005عاد عبادي وخلاص قال هذه لزوم الشهرة عشان ما أضيع خخخخ
قلت ترى الحياة هذه قصيرة والواحد لازم يكون صدره وسيع في كل شيء مو نسير مثل الشاكي والباكي والحزين نزعل من أتفه الأمور ونرضى بأتفه الأمور برضوا
مشيت بعدها إذا بشباب في سيارة مرسيدس 86رافعين المسجل على الآخر وأغنية محمد عبده أنا لك يا بريق الماس وقفوا يطالعون في العالم ايشبهم متجمعين جاني مجرد إحساس في نفسي إني أعرفهم قلت يارجال رح وفك نفسك من الربطة
ركبت سيارتي قلت مالها إلا الرياض نغير جو مشيت وأنا أتذكر صاحبي
عبد المحسن الزهراني الله يذكره بالخير يوم قال قصيدته المشهورة عط الحر فرصة....ما تندم على الطلعة...
قلت يالله أوقف أجل أسلم على الحبايب قبل ما أوصل الرياض وأحذ لي ساعة زمن على الأقل أواصل الأرحام يرضوا لأنه محنا في زمن قاسي عشان نقطع الرحم
خلصت ساعتي ومشيت أواصل رحلتي الخيالية !!!
المهم يوم أنا قربت من مضارب الرياض خيم الليل قلت اخذلي شقة وأريح فيها لين الصباح وأنا نازل من السيارة إلى في صوت ونين وبكى خفيف طليت بخفة وايش الصوت هذا يوم خرجت عليّ ذيك العجوز وبجنبها ذيك الفتاة الشامخة في طولها والرعبوب في شكلها قالت ايش فيك علامك تناظرني قلت لا بس سمعت صوت بكى قلت أشوف ايش هذا الصوت قالت هذا صوت أولدي فروس الفرفوش بس يبكي من الصبح بس ما يخالف دموعه مثل دموع الورود قلت الله يحفظه لك أهم شيء إنه طيب وفي صحة وعافية
عاد أنا من الخوف ما أدري وين أروح قلت لا تبلشني هذه العجوز
رحت وكملت طريقي للشقة إلا تذكرت إني نسيت الجوال عند العجوز من الفجعة طاح قلت بأرجع أخذه يوم قربت من المكان إلا في تجمعات غريبة طليت من فوق السور إلا والهلال الأحمر والإسعاف يالله علم خير وايش فيهم ذول المهم جوالي أبو كاميرا لا يكون معهم بس المهم قلت أنا مالي ومالهم أروح أدور لجوالي أنا ما سويت مصيبة عشان أخاف تجريت ودخلت بين المعمة وسرت أكلمهم مثل الدبلوماسي عشان لأحد يبلشني بمصيبة دورت يمين ويسار إلا الجوال عليه العوض شكله روح قلت الله يعوضّنا خير ما أمداني ألف كذا إلا وجوال يشبه جوالي في يد وحدة الصلاة على النبي العيطموس فيها بكل الموصفات حتى مشيتها كأنها برنسيسة وهي تمشي عاد أنا مالي منهم أبغى جوالي أبو كاميرا أبغاه
قربت منها وأنا أتلعثم وأجر رجل وأسحب الثانية إلا بدلوعة حدي من الحاشية حقتهم تقول وين وين يالأخو قلت ما برد عليها عشان لا ألفت الإنتباة توني بأكلم الأخت وأقول لو سمحتي هذا إلي معك جوالي أنا نسيته قبل شوي هنيهة تعمد أن تكون لهجتي منهم حتى لا يقولون إني أكذب وألا شيء
قالت أيّ جوال الله يحييك ويسلمك قلت إلي في يدك طال عمرك قالت يا بابا رح ألعب بعيد هذا قيمته 10000ريال قال جواله قال وركبت سيارتها ؟؟؟
قلت طيب انتظري دقيقة نتفاهم.. قالت برسلك مدير أعمالي ريان يتفاهم معك نزل ريان إلا ما عنده تفاهم زي الشيّاب ما خلى لي مجال أتفاهم معه لدرجة إنه بغى يطلع عليّ الحسام حقه من السيارة يبغى يضارب
قلت في نفسي خلك عظيم الشوق ويعوض عليك ربنا فيه ومشيت وكملت رحلتي
إلى إن وصلت الرياض وشفت شوارعها وبيوتها وقصورها حتى لدرجة إني شفت قصر ريم بنت الوليد تذكرته بالصور إلي شفتها قبل فترة
صراحة عجبتني الرياض لدرجة إني سرت مجنونها وولهان بها بعد حتى إني قررت أن أكون زي المسافر لها باستمرار من شدة إعجابي لها.
قرّب المغرب قلت أروح أصلي وأحضر مبارة أهلي الجمال هذا الفريق الراقي في لعبه وأخلاقه مع نادي العاصمة ,,,
لفيت الشوارع طول بعرض ما لقيت المسجد قلت خليني اسأل وأريح دماغي لقيت شايب كبير في السن قلت مسّاك الله بالخير يا والد قال جردي!! قلت أقول كيفك يا والد قال جردي!! قلت إيه والله هذه النشبة
قال هاه؟؟؟
قلت لالا ولا شيء بس بغيت المسجد الله يسلمك ويبارك فيك,, قال أول لفة يمين في يسار قلت إيه يا والد من أول قول ... قلت له أطلع معي أوصلك
قال لا يغرك أنا شايب بس خلونا حبايب معكم,,, قلت حاضر طال عمرك أطلع وبس
صليت وخرجت ورحت الملعب وأنا أقطع التذكرة إلي بواحد بسم الله الرحمن الرحيم تقول سينقو على وجهه يقول لي وين الهوية هيا هذا صاحي يا جماعة؟؟؟
بعد جهد جهيد أفتكيت منه ودخلت الملعب وخت مكاني وجلست إلا بإلي حولي كلهم يتكلمون في الأسهم وقرف الأسهم وفي واحد منهم ما يسكت بس يرغي خخخ
سمعته يقول بخفه لأخوياه ترى عندي لكم سهم من حلاوته سميته
سهم الوفا لأن فيه من المكسب الشيء الكبير إن شاء الله وأوعدكم أنكم بتدبلون رأس مالكم فيه عاد يوم جاء بيقول السهم دخلوا الفريقين أرض الملعب وصفقوا العالم وصار الملعب إزعاج ما سمعت ايش هو السهم ,,,
طول المبارة وأنا أفكر فيهم قلت أكلمهم بين الشوطين وأمري على الله خلّص الشوط وكلمتهم واستقبلوني برحابة صدر قالوا ما ينفع نتكلم الحين بعد المبارة نروح الاستراحة ونسو لف على راحتنا هناك !!!
لقطت وجهي ومشيت خخخخ لكن بصراحة أهم ما يميز الشباب ذولي أن القلب الأخضر حقهم واسع ويتقبل أيّ شيء ويحبون المرح والفلة والتطعيس أيش دخل التطعيس في الموضوع خخخخخخخخخخ
خلصّت المبارة قالوا الشباب ألحقنا على الاستراحة قلت ماعرفها قالوا أسمها استراحة الراضي محمد الراضي أول ما تطلع من الملعب في وجهك قلت أوكي خلاص أنا الحِّق عليكم
المهم رحت عندهم وقبل ما أدخل يطلع لي ذاك
القنفذ الناعم من تحت الأرض إلا وأنا شبلسك على رأسي من الخوف حسبي الله ونعم الوكيل
سلّمت على الشباب وجلست والأمل فيني في التعرف عليهم عن قرب المهم يوم جاء وقت العشاء إلا ببوران ريح تحمل معها مطر قلنا نخش داخل أحسن عشان ما ننعدم إلا أنا سرت زي الملتاع 
محترق من الهم على سيارتي خائف عليها من المطر قلت لازم أشوفها وشفتها وتطمنت عليها ارتاحت سريرتي وخلصّت رحلتي 
وسلامتكم جميعاً
هذا ما جادت به النفس لكم أتمنى أن تحوز على رضاكم وتعذروني إذا نسيت أحد
الشيء الثاني جميع تركيبات الأسماء في القصة في غالبيتها مستوحاة من معنى الاسم بالدرجة الأولى والمعذرة إذا فيه تشبيهات في غير محلها ,,
أتمنى لكم السعادة الدائمة ,,,,,
أخوكم
24-Apr-2007, 07:44 PM
إليكم أحبتي ... 
العرض العادي
